S’eco de Ribu leni

S’ECO DE RIBU LENI
(L’ECO DEL RIO LENI)

Tzurpu e mudu fit su bentu
Cando chi that connotu
Chenza vocales o consonantes
Parentis o puntos esclamativos:
Fit unu biatzadore chi fravicabat
Simetrias de istellas

In sas costas predasos
De mares assuttaos.
Una die su sonu est naschiu
In sa punta de sa bida.
S’est pesau bantzicau da e s’eco
Tronu ombelicale.

Iscuru sulare primordiale
Chenza bussola ne zumpadorju.
Est istau semper su bentu a iscribere
Sas notas de su cantu no intesu
E issa an’iscurpiu in sos seculos
Sa forma tua istellare.

Tottòra, in s’andela, has sorridiu.
Prus ass’ispissa has prantu.
Peri, solu in sa notte
Si zapat sa luche
Solu in s’asimetria de su tempus
Su criu zocat in s’arena de sas ispundas.

In s’ispatziu non connotu ‘e su sospiru
Est naschia s’isperanza.
Billu, naschit semper bibu in su focu
Preda e arena allisada.
Roddulada in s’astrintesa
Immaginaria de su sonnu.

Tottube lassinas
S’eco sonat torra a sa prima mirada
Datu chi ses luche de onda
Ghias su bentu a sas labras
Passu in su passu
Poddighes in sos poddighes.